Si të përballosh sindromën e ndërrimit të stinëve.

[Musafir]

Si të përballosh “sindromën e ndërrimit të stinëve”

• Lodhje, vështirësi për t’u ngritur në mëngjes apo probleme me pagjumësinë, vështirësi për t’u përqendruar dhe irritim.


Janë të gjitha simptoma të “ndërrimit të orës diellore”. Ndonëse nuk përbën problem serioz për shëndetin, mjekët neurologë tërheqin vëmendjen që nëse problemet me gjumin zgjasin në kohë, duhet bërë konsultë me mjekun specialist. Në një intervistë për “Panorama” mjeku neurolog, Agron Islamaj, shpjegon, se cilët janë kontingjenti më i predispozuar të shfaqin probleme, dhe si mund të kalohet sa më shpejt ky problem:
Doktor, është e vërtetë që ndërrimi i orës shoqërohet me ndryshime në sferën psikoemotive?
Ndodh që me ardhjen e vjeshtës dhe ndërrimin e orës, disa persona të shfaqin probleme me humorin, gjumin, aktivitetin e tyre të përditshëm intelektual. Shkaqet lidhen me faktorë të jashtëm atmosferikë dhe orët me dritën që ndikojnë në prodhimin e një hormoni: serotoninës. Mungesa e këtij hormoni shfaq ndryshime në ekuilibrin kimik, biologjik të organizmit, që manifestohen në tru.
Si shfaqen këto probleme dhe ku shfaqen më tepër?
Jo të gjithë njerëzit preken nga “sindroma e ndërrimit të stinëve” dhe jo të gjithë reagojnë në të njëjtën mënyrë. Më shumë probleme shfaqin: të moshuarit, personat e ndjeshëm dhe ankthcioz. Përsa i përket seksit, shfaqet më tepër te gratë, gjë që lidhet me profilin e tyre hormonal dhe biologjik, që i bën më të ndjeshme ndaj këtyre ndryshimeve. Ndërsa përsa i përket simptomave janë të ndryshme, por më të shpeshtat janë: probleme me gjumin, irritim, humor i keq, vështirësi në përqendrim, lodhje, këputje trupore, etj.
Si mund të kalohet lehtë ky problem?
Në përgjithësi, këto probleme kalojnë lehtë, me përshtatjen e organizmit me oraret e reja. Gjithsesi rekomandohet fototerapia, ndjekja e një higjiene të mirë të gjumit, respektimi i një stili jete të shëndetshme. Nëse këto probleme zgjasin në kohë, atëherë duhet konsultuar me një mjek specialist, sepse duhet marrë një mendim i specializuar dhe vendosur një diagnozë për ta trajtuar.

Ushqyerja

Natyrisht me ardhjen e vjeshtës dhe ndërrimin e orareve, duhet të respektohet një regjim ushqimor i balancuar dhe i pasur me vitamina, kripëra minerale dhe proteina. Vetëm në këtë mënyrë organizmi mund të marrë energjitë e nevojshme për të përballuar sa më lehtë dhe kaluar gjendjen e apatisë, që shoqëron vjeshtën. Rekomandohen ushqime me shumë kalori, sepse në këtë mënyrë mund të përballohen me mirë ndryshimet klimaterike.

STUDIMI

Llafet të bëjnë më inteligjent


Llafet nuk duket se janë fukarallëk, por ndihmojnë trurin, përmirësojnë memorien dhe të ndihmojnë të japësh maksimumin në testet e inteligjencës. Të paktën ky është përfundimi i një studimi të kryer nga studiuesit e Universitetit të Miçhiganit (USA). “Nga studimet tona ka rezultuar se socializimi rezulton mjaft efikas kur kryhen veprimtari mendore për të përmirësuar memorien dhe rendimentin intelektual”, ka shpjeguar Oscar Ybarra, psikolog i Institutit të Kërkimeve Sociale. Në studim kanë marrë pjesë 3.610 persona, me moshë nga 24 deri 96 vjeç. Pjesëmarrësve në studim u është kërkuar të tregojnë se sa herë në javë u telefononin dhe takonin miq, apo persona të tjerë. Studiuesit kanë zbuluar një lidhje mes frekuencës së kontakteve sociale dhe rezultateve të testit. Sa më të shoqërueshëm që ishin, aq më të aftë intelektualisht. Kjo vlente për të gjithë grupmoshat, që nga të rinjtë e deri te të moshuarit.