SI U DERTUA PALLATI I KONGESEVE!

[bledikorcari]

Megjithëse kanë kaluar gati dy dekada nga ndërtimi i tij Pallati i Kongreseve vazhdon të mbetet ende një nga godinat "simbol" të kryeqytetit. Ai u ndërtua për organizimin e kongreseve të Partisë së Punës, por edhe të festivaleve. Punimet për ndërtimin e tij filluan në vitin 1982 dhe përfunduan katër vite më pas në vitin 1986. Për ndërtimin e tij punuan ndërmarrjet më të mira në vend. Por modernizmi i godinës nga jashtë vazhdonte edhe brenda saj. Ambientet brenda saj u bënë një mënyrë që pallati të ishte edhe shumëfunksional dhe çdo gjë e vendosur atje të përshtatej me aktivitet që do zhvilloheshin. Një funksion që Pallati i Kongreseve vazhdon ta ruajë edhe sot pas 20 vjetësh.

Struktura e godinës
Pallati ka një shtrirje rreth 70 metra paralel me shëtitoren dhe lartësi 18 deri në 23 metra. Qëllimi ka qenë harmonizimi i mirë me objektet ekzistuese përreth si me Muzeun Arkeologjik, stadiumin "Qemal Stafa", Kryeministrinë e Radio-Televizionin Shqiptar.
Mjedisi kryesor është salla e madhe prej 2100 vendesh e kompozuar për të plotësuar kërkesat funksionale, artistike dhe akustike për zhvillimin e kongreseve, konferencave e koncerteve. E pajisur me ajër të kondicionuar, ndriçimin e nevojshëm, pajisjet e zërit, të televizionit, të përkthimit në disa gjuhë, të cilat do të shërbenin për veprimtari të ndryshme prej kongreseve deri tek koncertet. Pallati i Kongreseve u projektua që kthimi i sallës nga mjedis mbledhjeje në mjedis koncerti të projektohej me lehtësi. Për veprimtari të ndryshme u projektuan edhe tri salla me kapacitete 150, 280 dhe 300 vende si dhe shumë mjedise pune, shërbime e teknike. Rëndësi i është kushtuar trajtimit të holleve në tre katet, të cilat synohej të funksionin për shërbimet, pushimin, ekspozita e veprimtari të ndryshme.
Punimet për ndërtimin
Studim të veçantë ka kërkuar arritja e shprehjes së jashtme të objektit, duke synuar që ajo të jetë origjinale, e pastër, monumentale në përputhje me funksionin e tij. Pamja e jashtme me brinjët rrezore, xhamat me kënde etj., është frymëzuar nga ndërtimet e traditës në Gjirokastër, Berat dhe nga kullat e veriut, pa i kopjuar ato. Materialet veshëse janë zgjedhur sipas kërkesave arkitektonike. U bë një punë studimore e gjatë për njohjen, zbërthimin dhe përvetësimin e metodave të reja bashkëkohore për kohën, siç ishin modelet e llogaritjeve në hapësirë të konstruksioneve, metodat llogaritëse me elemente të fundme, duke përdorur skema statike të reja, të papërdorura më parë deri në atë kohë. Objekti nga pikëpamja konstruktive u konceptua që në rast tërmeti të punonte si një i tërë, në llogaritje u mor parasysh puna e njëkohshme si e elementeve horizontale ashtu dhe e atyre vertikale. Problem që kërkoi shumë studimore të veçantë, ishte dhe konstruksioni i mbulesës së sallës kryesore, e cila ka formë rrethore dhe një diametër 54 metra. Një mbulesë e tillë u ndërtua për herë të parë në vendin tonë dhe ishte e lidhur me shumë probleme të vështira, qoftë nga pikëpamja matematike, ashtu dhe konstruktive, ndërtimore e teknologjike. Punimet u kryen nga punonjësit e kantierit nr. 7 të ish-ndërmarrjes "21 Dhjetori"

Bulevardi i kryeqytetit

Pjesa më e madhe e ndërtesave më të rëndësishme të Tiranës janë të përqendruara në bulevardin e "Dëshmorët e Kombit", prej Xhamisë së Et'hem Beut deri tek Universiteti Politeknik. Bulevardi i madh ishte krijim i italianëve, të cilët mbanin parada gjatë Luftës së Dytë Botërore. Bulevardi fillon me një seri ndërtesash të ndërtuara në vitet '30 gjatë qeverisjes së mbretit Zog. Më pas vazhdon me Galerinë e Arteve përballë së cilës gjendet parku "Rinia". Më tej ndodhet Piramida apo siç quhet tani Qendra Ndërkombëtare e Kulturës "Pjetër Arbnori". Pak më tej është Kryeministria. Gjatë periudhës së komunizmit gjatë paradave zyrtare, udhëheqësit e partisë qëndronin në ballkon dhe bënin me dorë nga lart. Përballë gjendet Kryesia e Kuvendit, ku dikur ishte i vendosur Komiteti Qendror. Po në këtë anë ndodhet Presidenca, përballë të cilës është dhe Pallati i Kongreseve, në të cilin tashmë mbahen vetëm koncerte, konferenca e panaire dhe jo më kongrese si dikur. Në fund të bulevardit është sheshi "Nënë Tereza", ndërkohë që pak më tej është Universiteti Politeknik, i ngritur nga italianët.

Per çfare ka sherbyer

1. Kongrese
2. Konferenca
3. Koncerte
4. Festivale
5. Konkurse
6. Zyra për KQZ-në
7. Panaire