Humb jeten ne aksident automobilistik presidenti i Top Media, Dritan Hoxha.

[bledikorcari]

Dritan Hoxha, presidenti i Top Media humbi jeten ne nje aksident tragjik automobilistik sot ne oret e para te mengjesit. Ngjarja ka ndodhur rreth ores 01:50 minuta ne bulevardin Bajram Curri ne Tirane. Sipas njoftimit te policise makina Tip Ferrari ngjyre e kuqe me targa DK 3892 H, ne pronesi te 37 vjecarit nga Tirana ka dale nga rruga dhe pasi ka pershkruar ne nje hapesire te plote 82 metra eshte perplasur me pemen 3.1 metra, ne lulishten e lumit te Lanes. Per shkak te perplasjes se forte makina eshte ndare ne dy pjese dhe eshte shkaterruar teresisht. Ne vendin e ngjarjes mberriten forca te shumta policie, duke nderhyre menjehere, per te dhene ndihmen e pare 37 vjecarit. Dritan hoxha vdiq gjate rruges teksa dergohen ne Spitalin Ushtarak.

Humbja eshte e pazevendesueshme per gruan e tij Vjolcen. Dritan Hoxha do ti mungoje tre vajzave, Lorit, Sares dhe Redias si dhe djalit te tij te vogel Itan, i cili lindi vetem nje vit me pare.

Top channel dhe Top albania Radio nderpreu transmetimet e saj qe ishin parashikuar ne program pas konfirmimit te lajmit tragjik. Ne oren 9:00 nme Top Channel dhe Top Albania Radio u lexua nje komunikate ne te cilen nder te tjera thuhet: PAdyshim humbja me e madhe njerezore eshte per familjen e tij, per nenen Zyrane, e cila e rriti Dritanin ne mungese te babait te tij, qe per rastesi tragjike, ishte shuar dhe ai ne nje moshe te re. Dritan Hoxha u rrit mes halleve te shumta si te gjithe shqiptaret, ne shtepine e tij te pare ne Laprake.
Ne Lapraken qe e rriti si djalin e saj, Tanin, nje i ri i jashtezakonshem, icili merrej me shpikje teknologjike per te care terrin informativ qe kishte vendosur regjimi komunist. "Zemra e Dritan Hoxhes ndaloi ne mengjes, pikerisht pak metra larg vendit per te cilin ajo rrihte me fort, prane studiove te Top Channel.


Per me shume historik rreth te ndjerit Dritan Hoxha mund te vizitoni sitin e Top Channel


(balkanweb)

[bledikorcari]

Shuhet në aksident Dritan Hoxha, themeluesi i "Top Media"-s. Vdekja e papritur shokon qindra punonjës
"Fluturimi" i vdekjes së Tanit të Topit
Përplasja fatale në 97.5 metra shkaktoi vdekjen. Babai i 4 fëmijëve humbi jetën drejt spitalit
TIRANË- Presidenti i "Top Media"-s, Dritan Hoxha, humbi jetën në një aksident fatal automobilistik. Ngjarja e rëndë ndodhi në orët e para të ditës së djeshme, në bulevardin "Bajram Curri" në Tiranë, kur automjeti "Ferrari" me të cilin po udhëtonte 40-vjeçari Hoxha doli nga rruga, duke shkaktuar vdekjen e tij dhe të një vajze 27-vjeçare. Forca të shumta policie mbërritën menjëherë në vendin e ngjarjes, duke bërë të mundur dhe transportimin e Dritan Hoxhës në spital, por mësohet se presidenti i Top-Medias ndërroi jetë gjatë rrugës. Ndërkohë, ekspertë të policisë rrugore si dhe forca të shumta policie rrethuan vendin e ngjarjes, ku për më shumë se shtatë orë kryen këqyrjen për të zbardhur rrethanat e aksidentit. Nga hetimet e para, policia deklaroi se dyshohet që shpejtësia e madhe dhe rruga e lagësht kanë çuar drejtuesin e makinës drejt humbjes së kontrollit të makinës. Ndërkohë, "Ferrari" i ndarë më dysh, në pronësi të Dritan Hoxhës i është nënshtruar ekzaminimeve të mëtejshme auto-teknike.
***
Pak pas mesnatës së enjte, në orën 01:50 minuta, presidenti i "Top-Medias" ka qenë duke udhëtuar me 27-vjeçaren Entela Hysko, me automjetin e tij "Ferrari" me targa DK 3892 H në bulevardin "Bajram Curri" në Tiranë. Në rrethana ende të paqarta, ai ka humbur kontrollin e mjetit duke dalë nga rruga. Sipas policisë së Tiranës, e cila ka rindërtuar aksidentin, mjeti që drejtohej nga Hoxha fillimisht është përplasur me trotuarin e krahut të majtë të bulevardit si dhe me dy shtylla dekorative ndriçuese. Pas këtyre përplasjeve, 40-vjeçari nuk ka mundur të kontrollojë më automjetin, i cili është përplasur me një pemë, me perimetrin e trungut 3.1 metër. Kjo ka qenë dhe goditja fatale për jetën e babait të katër fëmijëve të mitur dhe 27-vjeçares Hysko. "Automjeti është shkatërruar plotësisht, duke u ndarë në dy pjesë, ndërsa 27-vjeçarja ka humbur menjëherë jetën",-thuhet në njoftimin zyrtar të policisë. Dritan Hoxha ka marrë dëmtime të rënda në pjesë të ndryshme të trupit, që i shkaktuan atij vdekjen vetëm pak minuta pas ngjarjes. Mësohet se zemra e tij rrihte në momentin që mbërriti policia, ndaj dhe ai u transportua me autoambulancë drejt spitalit, por nuk mundi të arrinte i gjallë në duart e mjekëve.
***
Në vendin e aksidentit mbërritën menjëherë zyrtarë të lartë të policisë së Tiranës si dhe ekspertë të policisë rrugore. U formua grupi hetimor nën drejtimin e zv.Prokurorit të Rrethit Gjyqësor Tiranë, Genci Qano, drejtues të Policisë së Tiranës, tre ekspertë të Institutit të Policisë Shkencore, Ekspertë të Mjekësisë Ligjore, dhe Ekspertë të Policisë Rrugore, pranë Drejtorisë së Përgjithshme të Policisë së Shtetit, për të zbardhur shkaqet e këtij aksidenti. Grupi hetimor punoi rreth shtatë orë në vendin e ngjarjes, ndërsa në orët e pasdites policia e Tiranës deklaroi dhe shkaqet e aksidentit. "Paraprakisht, nga konkluzionet e nxjerra nga ekspertë të grupit hetimor theksohet se shkaktar i ndodhjes së kësaj fatkeqësie është hapësira e madhe e zhvillimit të aksidentit, e cila kap distancën 97.5 metra, ku nga këqyrja e vendit të ngjarjes, dëmtimeve të tij si dhe treguesi i kilometrazhit të automjetit, në manometrin e shpejtësisë është fiksuar shpejtësia prej 170 km/në orë. Nga ekspertët në vendngjarje, sqarohet se drejtuesi i automjetit tip-Ferrari, duke ecur me shpejtësi tej normave të lejuara, në kushtet atmosferike me lagështirë, ka humbur menjëherë kontrollin e drejtimit të mjetit, duke dalë nga karaxhata e bulevardit "Bajram Curri" në Tiranë", -thuhej më tej në deklaratën e lëshuar pasditen e djeshme nga Policia e Tiranës.


HETIMI
Aksidenti, merren në pyetje dëshmitarët
TIRANË- Policia e Tiranës bëri të ditur dje se nën drejtimin e prokurorit të çështjes, nga grupi hetimor janë pyetur disa dëshmitarë okularë në vendngjarje, të cilët do të sqarojnë më tej rrethanat e kësaj ngjarjeje aksidentale automobilistike. Ekspertët auto-teknikë në vendngjarje, gjatë kryerjes së veprimeve hetimore, kanë realizuar me përpikmëri, hartimin grafike- skicor të ngjarjes dhe fotografik, duke i shoqëruar të gjitha veprimet procedurale me filmimet përkatëse. Ndërkohë, makina "Ferrari" është dërguar në mjediset e Policisë Rrugore, ku do t'i nënshtrohet ekspertizave të tjera.


"Ai jetoi me 300 km në orë dhe fluturoi larg, duke ndezur ekranin e shekullit të ri"
Edi Rama: Humbëm një nga njerëzit që bëjnë histori
Sot vdiq një njeri nga ata që bëjnë histori. Tani i Topit arriti i vetëm për 7 vjet atë që vendeve si Shqipëria u duhen 70 vjet për të arritur. Ai jetoi me 300 km në orë dhe fluturoi larg, duke kapur ëndrrën e tij dhe duke ndezur ekranin e shekullit të ri në një Shqipëri që ende jeton pas perdes së shekullit të vjetër. Vepra madhështore që Tani i Topit ndërtoi me intuitën e një gjeniu dhe pasionin e një fëmije, është modeli i një suksesi të barabartë me një jetë frenetike të jetuar në timon. Pa e ulur shpejtësinë për asnjë dekikë. Pa pyetur për orën dhe as për rreziqet e rrugës. Pa fjetur, përveçse duke mbyllur sytë, për të ecur më shpejt.
Pas profesionistëve e talenteve që në mikrofonin e "Top Albanias" dhe ekranin e "Top Channel" gjetën oazin e zhvillimit të tyre në kushte optimale, ishte jeta e një njeriu në kërkim të pareshtur të cilësisë më të mirë. Pas prurjes së pandalshme të risive të komunikimit, formateve moderne të pasqyrimit të aktualitetit, të qeshurave therëse të "Fiksit" e atyre me lot të "Portokallisë", tingujve të "Top Festit" dhe jehonës së stadiumeve të botës së Super Sportit në kohë reale, ishte jeta e një njeriu në garë me kohën. Pas tasteve të telekomandës që çelte çdo vit dritare të reja në shtëpitë tona, ishte jeta e një njeriu që s'mund të plakej.
Ikja e tij, përgjithnjë nga kjo botë që nuk i mjaftoi asnjëherë, le pas kudo trishtimin e thellë për ç'ka humbi sot Shqipëria. Së bashku me dhimbjen e madhe tek unë, për humbjen e një njeriu të jashtëzakonshëm, që pata fatin ta njoh nga afër qyshse nisi t'i japë jetë ëndrrës, për të cilën qe lindur dhe të cilës i kushtoi jetën.


Ngushëllimi i Presidentit
"Të dashur familjarë të Dritan Hoxhës
e keqardhje të thellë mësova për ndarjen e parakohshme nga jeta të të dashurit tuaj Dritan Hoxha, njeriut që me punën e tij ambicioze i dha një dimension të ri bashkëkohor teknologjisë së medias vizive në Shqipëri.Me humbjen e Dritanit, Top Media humbi themeluesin dhe promotorin energjik e vizionar të saj ndërsa nëna, bashkëshortja e fëmijët, njeriun e tyre më të shtrenjtë. Ndaj me ju dhimbjen e thellë dhe në këto momente të vështira ju shpreh ngushëllimet e mia më të sinqerta!", – thuhet në mesazhin e Presidentit Topi.


THEMELUESI
Vdekja e Dritan Hoxhës, "Top Media" në shok
TIRANË- Muzikë funebër në "Top Albania Radio". Dokumentarë rastësorë në ekranin e "Top Chanel". Vdekja e papritur Dritan Hoxhës ka shokuar qindra punonjës të "Top Media"-s, të cilët mbyllën dje "dritaret" e informacionit dhe hapën dyert për të pritur ngushëllime. Arkëmorti me trupin e themeluesit të grupit mediatik u vendos dje në mjediset e Piramidës, ku zhvilluan homazhe autoritetet më të larta të vendit, shtetërore dhe politike si dhe mjaft gazetarë. 40-vjeçari Dritan Hoxha themeloi grupin e fuqishëm mediatik në vitin 2001, i cili u imponua me shpejtësi në tregun shqiptar, duke u bërë ndër zërat më të rëndësishëm. Fillimisht ai ngriti radion "Top Albania", e më pas televizionin "Top Chanel". Hoxha u bë promotor edhe i projektit të guximshëm të futjes në Shqipëri të platformës dixhitale tokësore dhe më pas asaj dixhitale satelitore, platformë jo mjaft e përhapur në Evropë si dhe programet televizive në celular. Babai i katër fëmijëve të mitur, tre vajzave dhe një djali humbi jetën gjatë një aksidenti automobilistik, në afërsi të ekspozitës "Shqipëria Sot", shumë pranë studiove të kompanisë së tij, teksa po udhëtonte me makinën e tij.




LAMTUMIRË TANI I TOP-IT

Nga Koço Kokëdhima
Nuk kam komunikuar me Dritanin qysh kur më ftoi në një tryezë me mediabërësit e tjerë shqiptarë kur qeveria i kish dërguar një gjobë 15 milionë dollarëshe. E refuzova atë tryezë pa u
shpjeguar. Të gjithë tani mund të flasim mirë për të. Ai nuk jeton më, konkurentët dhe qeveritarët nuk kanë arsye ta shajnë. Ai bëri një sukses që nuk do ta arrijnë kurrë të tjerët. Aventura e tij nuk përsëritet. Në historinë e televizionit shqiptar, ky lloj suksesi ka ndodhur vetëm një herë, vetëm atëherë kur qe gjalle Tani i TOP-it. Fama e këtij suksesi ishte shumë më e madhe nga sa mund ta mbanin supet e tij. Vetëm një paranojak si ai mund të bënte një histori të tillë. Vetëm ai mundi të zbulonte dhe të kthente në ide biznesi nevojat e papërmbushura të shqiptarëve për spektakël, kinema, muzikë, promovim, komunikim e informim. Vetëm ai mundi t'i jepte një populli të tërë një jetë që s'e kishte, një jetë që s'mund ta jetonte dot jashtë ekranit të Tanit. Ky gjeni në sukses, mbeti aq i marrë, naiv e adoleshent në dëshira. Ai bashkonte gjëra të pabashkueshme, ai ishte një devijim nga normalja jo vetëm në racën e në kohën tonë. Këtë dëshmoi edhe në vdekjen e tij. Gjeniu i Piramidës sot do të shkojë në Sharrë dhe nuk do të kthehet më. Ai është nga ata lloj rebelësh që e lënë famën tek suksesi sepse vlejnë më shumë në harresë. Ne do bëjmë kujdesin e normalëve për ta "qëruar" biografinë e tij nga devijimet. Askush tjetër në të ardhmen nuk do ndërtojë dot një vepër aq vezulluese në bodrumet e piramidës. Për pak kohë edhe TOP-i do të ikë nga Piramida. Atje do të mbetet vetëm historia e tij, historia më e madhe e piramidës dhe e medias televizive shqiptare në të gjitha kohët.

__________________

[Musafir]

Humb jeten ne aksident automobilistik presidenti i Top

O ZOT me dridhet trupideri sa e lexove me vjen shum keq per kete po mendova se presidenti Topi Humb jeten ne aksident automobilistik presidenti i Top
Ngushllime te gjithe shqiptareve

[Musafir]

DRITANIT, ME RESPEK - BABAIT MEDIALTË SHIPËRISË ETNIKE,



Dritan Hoxha ishte dhe do të mbetet babai medial i nismës së vënies në praktikë të realizimit të synimit tonë kombëtar të Shqipërisë Etnike.
Përmes kompanisë së tij prestigjioze ”Top- media”, AI, arriti që së paku virtualisht t’i bashkoj të gjithë shpirtrat tanë të shkapërderdhura në 6 copëza dhe kudo në diasporë.
Kufiri është vepër njerëzish, ndërsa ETERI i paskajshëm, pjellë e Zotit . Dritani depërtoi mu aty në të pafundmen hyjnore duke na inkurajuar të mbetemi ashtu si gjithnjë krenarë - SA MIRË ËSHTË TË JESH SHQIPTAR!
Çdo fjalë tjetër ngushtimi do të ishte e tepërt për Dritanin...
I lehtë i qoftë dheu i Shqipërisë !

[bledikorcari]

Heshtja mbi Entela Hyskon,vajzen ne makinen e Tanit te Topit

--------------------------------------------------------------------------------

Sot ne gazeten 55 ishte ky botim:


Këtë temë dhe shkrim e mora përsipër, si shkrimtar, gazetar e qytetar. Për sa i përket qëndrimit në fushën e politikës, nuk e kam ndërprerë asnjëherë komunikimin dhe bashkëpunimin me televizionin Top Channel, edhe kur kolegë të tjerë nuk e kanë mbajtur këtë qendrim. Homazhi i gazetës tonë për vdekjen e presidentit të Top Channel-it iu bashkua homazhit të përgjithshëm të medias, sigurisht me ato specifika që gjithnjë e dallojnë gazetën “55”. Nuk i heqim ndonjë fjalë dhe nuk kemi asnjë të drejtë të gjykojmë reagimin e të tjerëve për këtë ngjarje tragjike. Por sigurisht, kemi ndjenjën e qytetarisë që të jemi gjakftohtë dhe të themi ndonjë mendim për ta emancipuar, kulturuar e qytetëruar qëndrimet ndaj kësaj ngjarjeje.
Përse u hesht për zonjushën Entela Hysko që ndodhej në këtë makinë dhe humbi jetën në mënyrë po kaq tragjike? Entela ishte pjesë e rëndësishme, aktive dhe shpirtërore e frymëzimit, për Top Channelin. Sigurisht, ajo ishte një lidhje konfidenciale e atij niveli që veçanërisht pas një ngjarjeje të tillë, fiton legjitimitet. Dhe në këtë rast, ke një arsye më shumë, që në homazhin për pronarin e Top Medias të ishte edhe homazhi për Entelën. Ajo ishte një vajzë e çmuar, ajo ishte njeri - dhe mbulimi me heshtje është një primitivizëm barbar. Pse heshtën shumë media për Entelën? Janë të shumta arsyet.
Në një rast tjetër, i ngjashëm për nga fundi tragjik, për një politikan, kryesisht mediat që heshtën, në çdo sekondë nuk merreshin me politikanin, deputetin që vdiq, por me zonjën që kishte humbur jetën me të. Dhe kjo bëhej me cinizëm politik. Absolutisht, mendoj se fshehjet, në këto raste, dhe krijimi i enigmave, është i gabuar. Njeriu ka një jetë dhe kur e humb atë, gjithçka tjetër nuk e ka kurrë më vlerën në tregun e moralit apo interesave që i përcaktojnë batakçinjtë dhe thithlopat e lekut e të gjakut. Në botë kanë ndodhur shumë ngjarje si kjo që ndodhi para 2-3 ditësh: Dajana ishte një princeshë, me një rrezatim politik ofensiv, por nuk u përpoq njeri që të heshtej për Dodi al Fajedin - e pastaj të mos bëhej fare homazh për të. Por jo vetëm ky rast, por shumë politikanëve e vip-ave, të politikës a të fushave të tjera, u kanë ndodhur ngjarje të tilla dhe shoqëria ka mbajtur një qendrim korrekt. Dhe jo një qendrim barbar, si ky ndaj Entelës. Përse e bënë këtë, për të bërë strucin? Ajo nuk ishte një leckë, ajo nuk ishte një asgjë. Të gjithë miqtë, shumë bashkëpunëtorë, shumë shokë të vetë presidentit të Top Medias, ia dinin faktin e lidhjes me Entelën, qysh në ngjallje. Dhe tani, ajo shumëzohet me zero. Dhe të parët hipokritë janë ata politikanë si Edi Rama, i cili, edhe pse nuk ka asnjë sensor që funksionon për raste vdekjesh, dhe që mendon vetëm se në dorë të kujt do të bjerë Top Channel-i, e teatron hidhërimin vetëm për njërën anë të tragjedisë. Po ti more zotëri, je kryetar i socialistëve, të cilët gjithashtu kanë sy e veshë, të ndjeshëm realisht, edhe për një bijë nëne, një vajzë babai, që humbi jetën. Dhe e humbi në dashuri!
Kjo tregon se shoqëria shqiptare, dhe veçanërisht këta birbot e politikës dhe zarbot e gazetave janë aq të palexuar, aq të pagdhendur, aq kriminalë dhe interesaxhinj, sa mund ta rivrasin të vrarën, dhe të bëjnë burrin e kanunit, që i bie këtë radhë, sipas këtij modeli, të hidhet nga shkëmbi për të ruajtur nderin, që s’e kanë pasur kurrë. Nuk duhet të harrojmë kurrë që kjo vajzë, që vjen nga kultura e artit, ka pasur një guxim të madh me këtë lidhje, dhe ka prerë biletën e një rreziku të përhershëm, që gjithashtu të gjithë në e dimë se pse.
Ajo mungon në shtëpinë e saj që prej dy netësh. Ajo mungon në sytë e shoqeve dhe miqve të saj që prej dy netësh. Ajo u shndërrua në eter nga heshtja servile, barbare, primitive dhe ndërkaq, të gjithë ata, që e shkaktuan këtë, e duan një Entelë dhe e kanë një të tillë në sediljen e pasme apo të përparme. Paçka se duke gogësitur bëjnë sikur i kanë të zbrazëta sediljet. Në këtë rast, dua ta mbyll këtë shënim me dëshirën e mirë dhe me thënien e famshme të një gruaje, e cila i tha dikur një mikeshe të të shoqit: je e mirëpritur në shtëpinë time, sepse ti e ke dashur tim shoq, se jo rrallë në këtë shtëpi ka qëlluar që kemi pritur edhe njerëz që e kanë urryer.
Pra, të mos i futim këto segmente të dhimbshme të jetës, këto kulminacione tragjike të ndjenjave në mokrat blonjëse të interesaxhinjve, hipokritëve, njerëzve pa shpirt, të njerëzve vetëm makina dhe kryesisht të atyre që gjithnjë mashtrojnë pa fund, pa fund, opinionin publik. Dhe shoqëria shqiptare në këto momente është absolutisht nën presionin e një mashtrimi të fortë mediatik.
Por gjithnjë do të gjendet dikush që e çan terrin, e kupton dhe e thotë të vërtetën, dhe e vërteta nuk është minorancë parlamentare, as tirazh gazetash komuniste, që u drejtohen dokerëve, fshatarëve, por është një levë Arkimedi që do vetëm një pikë mbështetjeje.
Fahri Balliu

Po ju cmendoni rreth kesaj heshje nga ana e mediave????

[bledikorcari]

ja dhe videjo qe ju kushtua enteles


https://www.youtube.com/watch?v=QLJu9k10p8I

[bledikorcari]

ja dhe FOTOJA e te ndjeres ENTELA HYSKAJ.

[Sponsored content]