"U shfryme, sepse u fryme si ai "kaposhi ne maje plehut"....

[Vizitor]

Të parët në grup! Mund të mundim çdo skuadër! S’kemi frikë asnjë kundërshtar! Hungaria, ekip që s’ka sharmin e kaluar! Kemi të drejtë të ëndërrojmë! Kam besim te skuadra! Dua gjashtë pikë! Do jemi skuadër ofensife! Kemi sharm dhe futbollistë europianë, etj., etj! Kështu shprehej Hani para ndeshjes me Hungarinë. Nuk bëhet fjalë për optimizëm apo karikim skuadre, por për një fushatë mashtruese për fansin shqiptar të përfaqësueses, të një amatorizmi dhe jo profesionalizmi. Përse u shfrymë dhe u zbythëm? Sepse vuajtëm delirin ballkanik dhe loja e Hanit për të justifikuar paratë. Trajneri nuk bëri asnjë analizë reale të asaj fitoreje, vetëm teknike, me Maltën, një ndeshje mashtruese dhe aspak e denjë për skuadrën tonë, për zgjidhjet taktike. U shfrymë, sepse ende vazhdon të shkojë kombëtarja mbas trajnerit dhe jo e kundërta, normalja, sepse dështimi i saj fillon që nga përzgjedhja e lojtarëve, organizimi i skuadrave përfaqësuese të moshave etj. U shfrymë, apo treguam se sa vlejnë, sepse kërkojmë të bëjmë kombëtare me lojtarë stoli në klubet e tyre, që nuk luajnë asnjë minutë dhe lëmë jashtë saj lojtarë mjaft rentabël, si Bylykbashi, golashënues, organizator, që marrin përgjegjësi apo dhe dinë të kthejnë lojën? U shfrymë, sepse mjafton të shikosh rezultatet e Shpresës apo kombëtares U-19, e cila, kjo e fundit, pësoi plot 8 gola në dy ndeshje, 5 nga të cilët prej Serbisë, dhe lënien jashtë të shumë lojtarëve cilësorë, apo klithmën e Ardian Aliajt për Shpresën në Kroaci, që të kuptojmë se ajo kombëtare do të shfryhet kurdo. Sepse, mjafton të kujtosh se kombëtarja shqiptare është edhe e emigrantëve, që sjellin rreth 1 miliard dollarë në vit në Shqipëri dhe janë oksigjeni për jetësën shqiptare, por ata detyrohen ta shikojnë ndeshjen nëpër satelitë, apo lart e poshtë, duke shënuar rekord historik në gjithë botën Televizioni Publik Shqiptar në këtë drejtim. Vetëm në Shqipëri ndodh ky transmetim antikombëtar, kur duhet të jepet falas në Televizionin Publik Shqiptar, edhe në satelit.

U shfrymë, sepse vetëm në Shqipëri ndodh që trajnerët e kombëtares nuk njohin dorëheqje për rezultate negative, por janë edhe disa herë më të paguar se trajnerët e Kroacisë, Austrisë apo edhe të Hungarisë. U shfrymë dhe mirë do të ishte mos të fryheshim si ai “gjeli majë plehut”, sepse do të duhen edhe shumë vite që të bëhet ekipi kombëtar. Ndoshta Kosova do të bëhet përpara nesh. Malta ishte daulle zie për një ndeshje futbolli, përtej rezultatit, por asnjëri nuk e dëgjoi, madje e trumbetuan triumf, kryesim, revolucion! Por “tullumbacja” u shfry dhe keqardhje s’duhet të ketë, por realizëm, ndershmëri dhe profesionalizëm. Madje historia e Hanit nuk është se ka reputacion, apo suksese më shumë se Kumani, por vetëm sherre, dështime, largime nga pankinat dha asnjë kontratë të përfunduar. Kjo kombëtare ka sharm, por ai do “hekurosur”, ruajtur, pastruar, larë. Fundi ynë, edhe kësaj radhe, dihet. Do të jemi të parafundit, duke lënë pas në klasifikim vetëm Maltën! Objektivi i radhës? Të mos turpërohemi si në Rumani në ndeshjen me Portugalinë. Të parët në grup! Mund të mundim çdo skuadër! S’kemi frikë asnjë kundërshtar…….! Por, fatkeqësisht u shfrymë.