POLICIA SHQIPTARE: numri prej 30 mije femra te trafikuara, absurd

[Musafir]

POLICIA SHQIPTARE: numri prej 30 mije femra te trafikuara, absurd
Policia shqiptare hedh poshtë akuzat e ngritura nga organizata joqeveritare "Poppy Project" me qendër në Britaninë e Madhe sipas së cilës Shqipëria renditej ndër vendet e para për trafikimin e femrave. Në një deklaratë për shtyp, policia shqiptare e konsideron absurd numrin prej 30 mijë femrash shqiptare të trafikuara në Mbretërinë e Bashkuar. Më tej në deklarate thuhej se në mes drejtuesve të Ministrisë së brendshme dhe drejtuesve të kësaj organizate nuk është trajtuar asnjëherë problemi i trafikimit të femrave nga Shqipëria drejt Britanisë së Madhe.

Reagimi erdhi menjëherë pasi që organizata "Poppy Project" raportoi para komisionit të brendshëm të parlamentit britanik dy ditë më parë.

Në raport Shqipëria renditej ndër vendet e para për trafikimin e femrave dhe se segmente të zbatimit të ligjit në Shqipëri janë të përfshira në mënyrë aktive në trafikimin e grave që përfundojnë në Mbretërinë e Bashkuar.

Sipas kësaj organizate, Shqipëria radhitet mes vendeve si Kina, Uganda, Tajlanda dhe Nigeria ku nuk luftohet trafikimi i grave për prostitucion në Britaninë e Madhe dhe nuk bëhet shumë për ta parandaluar.

Marr nga gazeta "Emigranti"